د غوږ غږ راډیو ویاند احمد خان نوید ووژل شو

۲۰ غوایي ۱۳۹۹

فیروز کوه- د غور ولایت سیمه ییز چارواکي وایي چې د غورغږ راډیو ویاند احمد خان نوید د فیروزکوه په نني لاریون کې د ډزو له امله ووژل شو.

 

په غور ولایت کې د افغانستان خبریالانو مرکز استازی سید معروف سعیدي وايي چې احمد خان نوید په غورغږ راډیو کې د افتخاري همکار په توګه کار کاوه.

د هغه په وینا؛ هغه د پېښې پرمهال په خپل دوکان کې و چې مرمۍ پرې لګېدلې ده.

د ځایي سرچینو په وینا دا لاریونونه چې خلکو ته د دولت له لورې د خوراکي توکو د غیرې عادلانه ویش پرضد ترسره شوي، وروسته په تاوتریخوالي بدل شوي او زیات شمېر لاریونوال د امنیتي ځواکونو په ډزو وژل شوي او ټپیان شوي دي.

دا پروګرام د مرکزي حکومت له لورې د کرونا ناروغۍ د خپرېدو له امله د هیواد په بېلابېلو ولایتونو کې  کې پېل شوې دی.

د غور والي ویاند محمد عارف عابر د دې پېښې د پخلي ترڅنګ ویلي چې د پېښې څرنګوالی پېل شوی دی.

د غورغږ راډیو مسؤل بسم الله عادل وایي چې نوید له شاوخوا شپږ میاشتو راهیسې دې راډیو سره د افتخاري کارکوونکي په توګه کار کاوه.

د غورغږ راډیو یوه سیمه ییزه رسنۍ ده چې شاوخوا درې کاله  مخکې یې د فیروزکوه په ښار کې پر فعالیت پېل کړی. دا راډیو ټولنیزې، کلتوري او بوختوونکې خپرونې وړاندې کوي.

د افغانستان خبریالانو مرکز په فیروزکوه کې په نني لاریونوالو د ځواک کارول په کلکه غندي، چې د احمد خان نوید په ګډون د خلکو د مرګ او ژوبلې لامل شوی دی او ترڅنګ یې ښاغلي نوید او نورو وژل شویو ته د بخښنې غوښتونکی دی او د کورنۍ غړو ته یې د جمیل صبر هیله لري.

دا بنسټ له مرکزي حکومت غواړي چې د دې پېښې د رامنځته کیدو جدي پلټنه وکړي او د خلکو پر وړاندې د تاوتریخوالي ترسره کوونکي دې د عدلي تعقیب لاندې ونیسي.