په غزني کې د الجزيره د خبريال نيول کېدل

دوشنبه، ۲۹ د وږي ۱۳۸۹

د الجزيره تلوېزيون د عربي برخې خبريال نن ورځ دوشنبه په غزني کې شاوخوا ۲ بجې د بهرنيو عسکرو له خوا ونيول شو.

رحمت الله نېکزاد له دريو کالو راپه دې خوا د الجزيره تلويزيون د انځور اخېستونکي او خبريال په توګه او د اسوشيټډ پرېس خبري آژانس سره د ولايتي خبريال په توګه همکار و.

د غزني پوليسو د بهرنيو ځواکونو له خوا د رحمت الله نېکزاد نيول تائيد کړي دي؛ مګر د دې عسکرو د هويت او د هغه د ساتنې د ځای په اړه بې خبري ښيي.

په هغه خبرپاڼه کې چې د آيساف يا د ناټو تر رهبرۍ لاندې سوله ساتو ځواکونو په کابل کې خپره شوې ده؛ راغلي چې په غزني کې يو کس طالبانو ته د تبليغ په تور نيولی دی.

له طالبانو د ويډيو چمتو کول پر رحمت الله نېکزاد د لګېدلو تورونو له جملې څخه دي.

رحمت الله نېکزاد د ۱۳۸۷ کال د چنګاښ په ۲۷ د دوه ښځينه پوليسو د مړو څخه د ويډيو کولو په تور چې د طالبانو له خوا وژل شوې وې؛ د غزني د ملي امنيت له خوا ونيول شو او وروسته له دوه ورځو څخه راخوشې شو.